FNAST.NET nació en xineru d'esti añu y dende InfoAsturies interesémonos por saber como va esti proyeutu informativu autoxestonáu y pa ello nadie meyor que Xicu Ariza, estudiante de periodismu, músicu y direutor de FNAST.NET. De pasu, tamién falemos  d'otres cuestiones sobre'l pnorama musical y sobre la comunicación dixital n'asturianu.

• Bono, pa entamar, tenemos que remontamos al fancín "Fechu n'Asturies" ¿non?
  
  
   Sí. Hai que remontase concretamente al mes de marzu del 2007, fecha na que asoleya’l primer númberu de “Fechu n’Asturies” fancín impresu autoxestionáu que recoyía información sobre’l panorama musical alternativu asturianu. D’esti mediu impresu editáronse tres númberos entre marzu del 2007 y xineru del 2008. Nellos había noticies, reportaxes musicales y d’actualidá social, reseñes y entrevistes y los 1000 exemplares que s’asoleyaben de cada númberu distribuíense per chigres y llocales d’Asturies pa que la xente los garrara de baldre. En xineru del 2008 sal a la cai el tercer y caberu númberu del “Fechu n’Asturies” y entama una dómina de reflexón y dificultaes que darán pasu a fnast.net como vía de salida. 
   

• ¿Cómo valores aquella experiencia en papel?
  
  
  
  Foi una esperiencia perpositiva. Cuando entamó “Fechu n’Asturies” la cultura de fanzines taba bastante muerta n’Asturies, aportando nós el nuesu granín d’arena y puxando por recuperar esi espíritu d’autoediciones informatives. “Fechu n’Asturies” yera un fancín que tenía les sos carencies n’aspeutos como la temporalidá o la distribución, pero eses dificultaes tienen la so causa na poca xente que tábemos llevando’l proyeutu y la curtia edá que teníemos, que siempres ye una baza a la escontra. 
  
  
  Per otru llau, col “Fechu n’Asturies” cumplimos los nuesos oxetivos. Fuimos quién a facer un fancín de música alternativa asturiana nunes feches nes que nun esistía nada apaecío, amás de’eso llogramos facelo d’una forma autoxestionada y autoeditada lo que siempres ye más satisfactorio personalmente y encima  distribuíemoslos de baldre, puxando porque tol mundu tuviera accesu a él ensin tener que pagar ná.Si non esistiera la curtia esperiencia de “Fechu n’Asturies”  FNAST.NET nun esistiría anguañu.
   
  

• ¿Qué ventaxes ya inconvenientes-y alcuentres al formatu dixital?
  
  
  
  Ventaxes abondes ya inconvenientes bastantes. En ventaxes tienes, sobre too, la inmediatez d’espublización de la información y qu’ésta altraviés de la rede llega a tol mundu que tenga internet y teclée www.fnast.net  nel so navegador. Otra gran ventaxa ye la flesibilidá que’l formatu dixital da a la hora de meter conteníos. Puen escolingáse  vidios, semeyes, descargues musicales, pdf… daqué que’l formatu impresu nun permite. Y tamién l’aspeutu económicu ye otru gran puntu a favor. Una edición impresa ye muncho más cara de caltener, más tovía si quies distribuyila de baldre, asina foi  como se llegó, con “Fechu n’Asturies”, a perder perres con un númberu. Col formatu dixital pagues un dominiu y un hosting al añu y ya tá, lo qu’aida a quitar munchos comederos de tiesta pol tema perres.
  
  
  Sobre los inconvenientes de la información altraviés d’internet yo veo, sobre todo, la dificultá de llectura. Ye muncho menos afayaízo tar lleendo delantre l’ordenador sentáu nuna siella que lleer una revista, periódicu, fancín, etc. sentáu onde tu quieras, nel llugar onde tu quieras, na postura que tu quieras… Amás una edición impresa siempres se pue conservar colos años, nos medios dixitales se pue acceder a la hemeroteca… pero nun ye lo mesmo. Sinceramente espero que pesie a qu’anguañu se tea puxando más pola información dixital y aprovechando toles sos ventaxes, les ediciones informatives impreses se mantengan y nun desapaezan.  
  
  

• Y del panorama musical fechu n'asturies ¿qué nos pues dicir? ¿Ves meyoría nos últimos años?
  
   
  Meyoría hai, pero ye una meyoría mui relativa. Lo que ta claro ye que pela nuesa parte informativa si qu’hai muncha meyoría, porque col proyeutu de FNAST.NET tamos muncho más enteraos de lo que se cuez musicalmente n’Asturies de lo que tábemos cuando facíemos el Fechu n’Asturies.Del panorama musical fechu n’Asturies pueo falate de diferentes escenes colos sos grupos, de zones xeográfiques, de llocales… Anguañu n’Asturies cultívense bastantes xéneros musicales: rock n’inglés, castellán y asturianu, música xamaicana, hardcore, metal y tolos sos subxéneros, hiphop de gallitos y hiphop políticu, folk, pop, jazz…
  
  
  El problema ye que tenemos desconocimientu - anque nun ye un desconocimientu xeneralizáu - de les estremaes escenes musicales. Cada siguidor d’una escena queda nella ya ignora a les demás, asina ye como por exemplu yo, más enfotáu na escena rock n’asturianu, desconocía práuticamente a la mayoría de grupos hardcore qu’hai n’Asturies y probablemente dalguién que trabaye un rock clásicu nun sepa que n’Asturies esisten soundsystems…Esti problema tien varies causes y yo creo que la principal ye’l silenciu que dende munchos medios de comunicación se-yos da a ciertes escenes y grupos minoritarios. Rara ye la ocasión qu’un grupu que nun lleve munchos años nos escenarios y nun siga’l carru de la comercialización o nun tenga grandes mases de públicu, reciba atención por parte los medios mayoritarios.Pero bueno, pa iguar esto ta FNAST.NET ¿non? Jejejejeje 
  
  
  D’otra miente, sorrayar otru factor pernegativu pal panorama musical asturianu: Esisten sales de conciertos y hai conciertos n’Asturies tolos fines de selmana del añu, pero’l gran problema ye qu’esta actividá musical concéntrase práuticamente na ciudá de Xixón siguía, a muncha distancia, d’Uviéu.Les demás zones d’Asturies tienen xeneralmente un déficit no que cinca a la ufierta musical. Nun hai sales de conciertos, nin llocales pequeños, nin centros sociales okupaos onde los grupos tengan un llugar pa tocar; abondos Ayuntamientos ya Instituciones nun puxen polos grupos llocales… esto xenera unes mui males dinámiques pa cola música asturiana, ya que lo pior de too ye que nesos llugares onde nun hai infraestructures musicales esisten grupos de música, bandes que nun pueden desendolcar la so actividá musical na so llocalidá porque, tanto dende l’ámbitu públicu como l’ámbitu priváu como l’ámbitu militante, nun se trabaya por ello.  
  
  

• Yá entrando nel proyeutu informativu d'anguañu, desplicamos cómo, por qué y pa qué naz FNAST.NET.
  
   
  Bien, pues volvamos a remotanos al añu 2008 y al proyeutu del “Fechu n’Asturies”.  Como dixe enantes, el caberu númberu d’esa publicación asoleyamosla en xineru dando pasu a un períodu de reflexón y dificultaes.  La reflexón entama porque se quier renovar el proyeutu informativu, da-y una nueva mano pintura pa facelo más ampliu, ye dicir, amplialu a más escenes musicales, da-y nuevos conteníos, meyorar les torgues de distribución…Esto améstase con una serie de dificultaes qu’aporten negatividá al proyeutu. Falta de responsabilidá pela nuesa parte respeutu a la temporalidá, los yá mentaos problemes de distribución, poca conexón colos grupos d’Asturies que non responden como nós esperábemos a esta publicación… 
  
  
  Asina ye como en branu del 2008 énte esti aire de negatividá súmase una nueva torga: yo, persona que llevaba principalmente’l pesu‘l proyeutu, veome forciáu a emigrar d’Asturies en setiembre pa entamar unos nuevos estudios n’Euskal Herria. Yá fuera d’Asturies, sobre’l mes d’ochobre, entamo a baraxar la idega de poder siguir faciendo’l fechu n’Asturies dende la distancia y amás da-y esa nueva cara de renovación del proyeutu, la clara solución foi dar el pasu al formatu dixital, pa poder facer daqué más amplio y a 269 kilómetros de Xixón. Ye asina como, col sofitu de delles persones que yá andecharen nel “Fechu n’Asturies” y nueva xente que se sumó al nuevu proyeutu, ponémonos a trabayar pa dar pasu a www.fnast.net, mediu de comunicación dixital qu’asoleyó’l 5 de xineru del 2009.El por qué y pa qué del surdimientu de FNAST.NET tien la so rempuesta na nuesa búsqueda por crear un mediu de comunicación dixital, qu’informe sobre música alternativa asturiana, que seya n’asturianu, que puxe pola cultura llibre, que se preocupe polos grupos minoritarios y sirva de puntu d’alcuentru ente diferentes escenes musicales asturianes.Pero sobre too FNAST.NET naz pa puxar pola nuesa música, polos nuesos grupos, por da-y voz a un panorama musical que dende los grandes medios de comunicación ignoren.
  
    

• FNAST.NET lleva furrulando unos meses yá ¿Cómo valorais esti tiempu? ¿Ta teniendo bona acoyida nel panorama musical?
  
  
  
  Esti mes de marzu ye’l tercer mes d’esistencia de FNAST.NET, tamién el segundu añu dende’l surdimientu de “Fechu n’Asturies”. Facemos balance d’esti tiempu como un períodu d’adaptación y de trabayu. Al entamu hai munches dificultaes, tenemos que llegar a la xente, a los músicos, FNAST.NET tien que sonar yá que naguamos por convertinos nel mediu de comunicación de referencia de la música asturiana.Esto namás s’algama con muncho trabayu detrás, metiendo noticies tolos díes, contautando con grupos, sellos, llocales musicales… faciendo coses que poco a poco vayan afitando esti proyeutu. Nós, pela nuesa parte, tamos faciendo les coses d’una manera digna, aunque con muncho trabayu concentráu en mui poques manes. Somos nós los que tenemos qu’espublizar tolos díes conteníos, los que tenemos qu’algamar financiación pa sostener esti proyeutu, los que tenemos que contautar con grupos, los que tenemos que publicitar información sobre esti mediu en foros, otros medios de comunicación, etc, etc. Hai muncho trabayu por facer, pero si nos lo creemos, si creemos nesti proyeutu, si creemos na música alternativa asturiana,  podemos facelo y  vamos facelo  con toles dificultaes que se nos pongan pel mediu.
  
  
  Tocántenes a la acoyida nel panorama musical pues, sinceramente, dende’l mio puntu de vista, nun ta cumpliendo les mis espectatives. Necesitamos muncha más collaboración por parte los grupos, que nos manden les sos noticies, biografíes, novedaes discográfiques, feches de conciertos… lo que quieran.Esti proyeutu ye pa la música alternativa asturiana, si les bandes d’Asturies y llocales musicales non andechen con esti proyeutu, nun tendría xacíu. Ye por eso qu’agradecemos abondo a tolos grupos y llocales que nos manden cosines al correu de redaición y facemos un llamamientu a que la xente siga collaborando con nós, pa ente toos siguir trabayando pol panorama musical fechu n’Asturies. 
  
  

• ¿Y qu'ufierta FNAST.NET al internauta?
  
  
  Por resumir dicir qu’ufierta diariamente noticies d’actualidá musical y una axenda de conciertos actualizada. Cada mes podemos lleer un nuevu editorial, reportaxes d’actualidá musical y social, columna d’opinión, reseñes discográfiques y cróniques, asina como ver y sintir les nueses entrevistes audiovisuales. Tamién permanentemente esiste un foru nel qu’aldericar, una seición de descargues, un llistáu de grupos d’Asturies que pocu a pocu va medrando y delles semeyes.

• Pue estrañar qu'aparte de música tamién alcontremos actualidá social.
  
   
  Pue estrañar sí. Pero somos xente comprometía socialmente que creemos nun mundu más xustu y llibre, que denunciamos los crímenes que’l sistema social, económicu y cultural dominante ta faciendo-y al mundu y que, sobre too, nun tragamos cola pasividá xeneral de la xente ante tales inxusticies, pasividá alimentada polos medios de comunicación mayoritarios y el sistema de consumu y ociu cultural dominante. Creemos que la música ye un bon instrumentu pa espertar conciencies, pa tresmitir un mensaxe críticu pa colo impuesto y llamar a la movilización del Pueblu.Creemos que ye llexítimu denunciar temes d’actualidá social nun mediu de comunicación sobre música porque creemos qu’esti sistema entiende a la música como una mera mercancía de compra-venta, na que solo importa que se venda bien nel mercáu ensin importar un res la calidá y esfuerzu del creador.Ye por eso que nesti sistema la música non comercial ye silenciada y más tovía la música que critica a lo dominante.
  
  Por eso creemos que namás dándo-y la vuelta a la tortiella algamaremos un mundu con nueves formes d’entender la cultura y la música, formes que valoren la calidá, que respeten al músicu y les diferentes músiques tratándoles con dignidá, n’igualdá y non entendiéndola namái como una mercancía más. Por eso reflexamos temátiques de cálter social en FNAST.NET, p’abrir güeyos, apelar a les conciencies y amuesar d’un manera crítica lo que ta pasando col mundu.

• L'apueste pol asturianu como llingua vehicular fai de FNAST.NET un nueu mediu "n'ast" ¿Cómo ves el mundín informativu en llingua asturiana d'anguañu?
  
  
  
  Independientemente de que comparta o non llínies editoriales, cualaquier apuesta informativa que puxe pol asturianu como llingua vehicular veola positiva nun sentíu estrictamente llingüísticu. FNAST.NET xúbese al carru de la información n’asturianu col claru compromisu de puxar por esta llingua y ampliala a nueves estayes informatives. Somos un nuevu granín d’arena nel mundín informativu asturianu, un mundín pequeñu. Esisten medios de comunicación n’asturianu pero son insuficientes, como yá dixe, veo con bonos güeyos nel sentíu llingüísticu los qu’esisten, pero son mui pocos y toos concéntrense práuticamente n’información d’actualidá. Creo que tien qu’haber más medios de comunicación n’asturianu y sobre too qu’esta llingua s’amplie a medios de comunicación de diferentes ámbitos: musical, deportivu, cultural, información xeneral, información d’actualidá, ciencia, hestoria, prensa, radio, televisión… 
  
  Cada nuevu mediu de comunicación que nazca na nuesa llingua ye una aportación dignificante pal asturianu.Ta claro que nun nos lo van dar fecho, tanto’l gobiernu asturianu altraviés de los medios de comunicación públicos, como la mayoría de les iniciatives privaes apuesten pola llingua castellana como llingua vehicular. Frenti a esto la rempuesta de la xente comprometío pa cola nuesa llingua tien que ser la de siguir trabayando por ella cola creación de medios de comunicación n’asturianu, porque l’asturianu – como toles llingües – pue informar perfeutamente tanto de temátiques tradicionales asturianes como de temátiques de calter científicu, o nel nuesu casu, musicales. 

• ¿Cuála pienses que ye la aportación más importante de FNAST.NET a la comunicación dixital na llingua d'Asturies?.
  
  
  
  Llevar la llingua d’Asturies al ámbitu musical altraviés de la creación d’un mediu de comunicación musical.Tolos medios de comunicación dixitales tienen una estaya de música que ye d’agradecer, pero esta estaya musical suel reducise a grupos n’asturianu u otru tipu de grupos de reconocimientu. Ye raru ver una noticia sobre un grupu minoritariu hardcore o hiphop nun mediu de comunicación dixital que use l’asturianu como llingua d’espresión.Poro, creemos que nós facemos una importante aportación al informar de diferentes escenes musicales de les que, hasta agora, si se llegaba a informar facíase práuticamente en castellán. Al ser una páxina abierta a diferentes ámbitos musicales algamamos que persones provenientes d’otres escenes musicales non sensibilizaes col asturianu, s’averen a esti mediu de comunicación cuyos conteníos son n’asturianu dafechu y, por tanto, s’averen a la llingua d’Asturies.
  
  Somos conscientes de que informar namás n’asturianu lléndanos y fai que munchos grupos y públicu nun se suban al carru de FNAST.NET, pero ye’l nuesu compromisu, el de puxar y dignificar esta llingua y  caltendrémoslu pesie a tolos factores que puean esistir escontra.

• Nada meyor qu'una visita a www.fnast.net pa conocelo meyor, poco más nos queda que falar. P'acabar, si quies amestar daqué o dici-yos dalgo a los nuesos llectores, tas en to casa.
  
  
  Lo primero dar les gracies a INFOASTURIES.NET por danos voz nel so mediu de comunicación, ya daqué d’agradecer enforma. A los llectores dici-yos que, si amen y creen na música asturiana, s’animen a visitar FNAST.NET. Qué comprendan que ye un mediu que ta acabante de nacer y qu’entovía tien les sos carencies y torgues pero que trabayaremos por meyoralo ca vegada más. A los músicos que llean INFOASTURIES.NET deci-yos que s’animen a mandanos la so información: noticies, biografíes, novedaes discográfiques, etc a la siguiente direición: Esta direición elleutrónica ta curiada escontra spam bots. Precisa activase JavaScript para vela . Nós caltenemos el nuesu compromisu d’espublizar tolo recibío, amás d’agradecelo.
  
  
  Ensin más, facer un llamamientu a tola xente disconforme colo impuesto, a tola xente que defienda l’asturianu, a que se conviertan en creadores. Qu’ellos tamién construyan alternatives informatives, musicales, sociales, de too tipu. Naide nos va dar ná fecho porque dende’l poder les coses van como quieren que vayan, ye’l nuesu llabor como seres críticos y comprometíos el de crear alternatives a lo impuesto. FNAST.NET naz como una alternativa informativa’l silenciu mediáticu mayoritariu haza la música non comercial asturiana. Ye una alternativa más, pero ye insuficiente Necesitamos más creaciones crítiques, más creaciones n’asturianu, más creaciones que nun baillen al son de lo impuesto. Namás tenemos que creer nello y animase a construyir, a tomar el cielu por asaltu. De lo contrario, si naide se mueve les coses siguirán el mesmu camín: el del mundu desigual, el del desaniciu de la cultura y la llingua asturiana, el que’l poder quier.
  
  Construyamos alternatives. 
  Munches gracies.
  
  www.fnast.net
  www.myspace.com/fechunasturies
  Esta direición elleutrónica ta curiada escontra spam bots. Precisa activase JavaScript para vela

Share Link: