Partíu mui equilibráu y con un gran desgaste físicu, nun tarrén de xuegu mui pesáu y en males condiciones d'agua y barru, el que se disputó n'El Naranco. L'Hernani supo utilizar les sos armes mele, saque de llateral y maul, y que l'Uviéu nun pudo frenar nos cuatro ensayos y el bon partíu de Henry, apertura, con un acierto del 100% en tiros a palos, consiguiendo 17 de los 22 puntos del equipu asturianu. El prósimu sábadu 14, nuevu partíu en casa contra l'Eibar a les 16:00 hores.

Pese a xugar con un xugador menos los primeros diez minutos del partíu, por tarxeta amariella a David Rey y perdiendo 0-7, l'Uviéu adelantóse nel marcador con tres güelpes de castigu tresformados por Henry, poniendo el marcador 9-7. L'Hernani marcó un nuevu ensayu, non tresformáu, al final de la primer parte quedando 9-12.

La segunda parte entamó con un güelpe de castigu tresformáu pol Hernani, y un nuevu ensayu de la so delantera, poniendo'l marcador en 9-22, a partir d'esti momentu,  l'Uviéu Feve empincipió a abrir el balón, llogrando Henry tresformar dos güelpes de castigu, col resultáu de 15-22. Cuando paecía que'l quince del osu diba a dar la vuelta al marcador, l'Hernani consiguió un ensayu poniéndose 15-27, la reaición del equipu asturianu llogra un ensayu d'Andrés, tresformáu por Henry, pero yá nun daba tiempu a más quedando'l resultáu final en 22-27, lo que-y val al Uviéu Feve pa sumar un puntu defensivu.

15 inicial: Kike, Rober, Pelayo (C), Tito, Cameron, Davizon, Christian, Simon, Daniel, Henry, David Rey, Tato, Josh, Andrés y Martin. Cambios: Salinas por Tito, Fer por Kike, Chris por Rober, convocaos y nun xugaron; Diego, Moran, Fon y Paco. Espectadores: Unos 300, pese a la lluvia y vientu.

CLASIFICACIÓN DIVISION HONOR B (grupu 1) XORNADA 4.

1º HERNANI CLUB RUGBY E.        18 puntos

2º FÚTBOL CLUB BARCELONA      15  "

3º BARCELONA UNIV. CLUB         11  "

4º UNIVERSIDADE EDNON VIGO  10 "

5º OVIEDO FEVE RUGBY CLUB      9 "

6º GETXO ARTEA RUGBY CLUB     9 "

7º DURANGO ILARDUYA R. T.       5 "

8º EIBAR HIERROS ANETXE R. T.  1 "

PRIMER DIVISIÓN (grupu A)

Na primer división el Rgby asturianu cuenta con dos representantes, el Belenos RC y el Cowper. Na quinta xornada el Belenos avilesín sumó la so cuarta victoria énte'l Campus Ourense por 22-36,  mientres que'l Cowper uvieín perdió en San Lázaro 11-13 contra los gallegos de Os Ingleses.

La CLASIFICACIÓN na quinta xornada (el Crat Uni. da Coruña y el Belenos tienen un partíu más):

1º CRAT UNIVER. DA CORUÑA  21 puntos

2º BELENOS RUGBY CLUB        19 puntos

3º C.R. CORETI LALÍN             10  "

4º OS INGLESES RUGBY CLUB  10  "

5º COWPER UNIV. OVIEDO       6  "

6º CAMPUS OURENSE R.C.        5  "

7º C.R. FENDETESTAS             0  "